購物四圍走 體驗斐濟式生活

要了解一個國家嘅文化，行當地嘅街市同超市就一清二楚。用咩方式賣買、點樣同班街坊互動、有咩類型嘅產品，其實都係話緊俾大家知呢個地方嘅生活習性，飲食文化，甚至宗教習俗。好似斐濟，當地嘅街市同超市就有濃烈嘅本土特色，今次人人去旅行就帶大家走訪斐濟不同嘅購物點，睇下斐濟人平時係點樣生活。
 

第一站 陀地超市
去當地超級市場格吓價，就會發現更多呢度嘅消費模式同物價水平。同一般超級市場一樣，呢度嘅基本日常用品，應該要有嘅都有，同香港嘅小型超市差不多。睇下啲價錢先…兌返港幣都唔算貴！一包薯片$8左右，餅乾一包$3都有找。仲有香港賣到好貴嘅Fiji純水，真係唔敢相信，喺度賣緊港幣只係$4.2！雖然超市成日俾人話係全球化嘅產物，個個國家超市賣嘅產品都一式一樣，但係呢度都好唔同，例如Punjas、Gangas、Farmers同FMF等本地品牌，都好受歡迎，因為斐濟好堅持—「斐濟人用斐濟貨」。

 第二站 市集的買與賣

斐濟位於熱帶地區，每日平均都有22度，氣候溫和，農產品自然就生得靚啲啦！所以連帶街市都特別興旺，仲充滿住斐濟特色添。喺首都蘇瓦，最大型嘅一個市場就係專賣各種各樣嘅熱帶蔬果。呢度每日都會開放，一到星期六、日，仲墟冚到不得了，個個都爭住要買最新鮮嘅食材。搵到靚材料，成功感咪就係咁樣建立返嚟囉。斐濟人仲好有環保概念，用完嘅麵粉麻袋竟然俾佢地諗到用嚟做環保袋，型格得嚟又唔浪費，真係創意滿分！

唔似得香港，斐濟冇所謂地產霸權，超市唔多，反而小販攤檔到處擺。只要肯做肯努力，一樣可以填飽三餐，過安穩日子。斐濟雖然唔算係發達國家，但係可以見到呢度係生機處處架。
 

第三站 的骰大商場

喺斐濟蘇瓦，最大型嘅購物中心對香港嚟講都只係個小型商場。不過唔好睇佢咁細，精品服飾、電子產品、美食廣場都有齊，又平質素又高嘅商品唔難發現架！

第四站 免稅手信店看風土人情
臨走個陣總係好唔捨得，萬般帶不走，唯有買紀念品留念下。手信店專賣斐濟特色產品，一樣可以睇到好多斐濟嘅歷史文化。因為斐濟係自由港，免稅店應運而生，鍾意買野嘅朋友都可以喺度盡情血拼！

想了解多啲斐濟嘅地理背景，睇下佢賣咩特產就知。斐濟真係一塊福地，擁有豐富嘅天然資源，淨係最基本嘅水都含有深層礦物，味道甘香，不加防腐劑，連奧巴馬都係佢嘅忠實fans，出國成日都帶住佢。斐濟嘅護膚品牌，例如Pure Fiji，都係出名自然純淨，用嘅係本地天然材料，例如椰子油、椰乳、同埋海藻等等，佢嘅椰子系列同埋手工皂系列都好受歡迎架，日日搽吸收日月精華，真係中女都後生返幾年。斐濟好多酒店都係用緊佢嘅產品，遠至歐美都有好多Hollywood靚明星用緊。

斐濟人有智慧又做得野，鍾意整埋整埋好多手工藝品，嚟斐濟點都要幫襯下呢班咁勤力嘅斐濟人！斐濟人被譽為南太平洋上最好嘅木雕師，雕工精細，佢地嘅木雕真係好值得收藏。仲有馬西布(Masi) ，亦即係塔巴亞麻織物，係斐濟嘅傳統服裝。用紅黑兩種天然色素喺織布上面印上嘅圖案，已經成為斐濟嘅獨有標記。連斐濟航空個logo，都係由著名嘅馬西藝術家Makereta Matmosi設計，logo上面嘅塔巴圖案，完全突顯左斐濟嘅傳統文化。塔巴圖案印喺服飾、桌巾同布袋上面，都好有民族色彩，喺呢個樣樣野都機械化同大量生產嘅年代，咁別緻嘅手工藝品真係買少見少喇！斐濟人咁堅持本土文化、自給自足，
呢種精神，抵讚！
隔住個mon睇點及親身體驗嘅感受咁深呢！而家有個好消息！斐濟航空做緊promote: 由香港去斐濟，來回只需$4500(未連稅) 咋，如果你有興趣去斐濟，可以睇下斐航個網站:

官網：www.fijiairways.com

Fiji Airways 斐濟航空

擁有60多年歷史的斐濟航空，是斐濟國營航空，也是南太平洋最主要的航空公司，主要提供往來於太平洋地區、北美洲和香港的航班。每周提供三班從香港直飛斐濟南迪，採用最新的A330空中巴士，帶您直闖南太平洋的天堂!

嗚謝:斐濟旅遊局

http://www.fiji.travel/