現正於台灣拍劇的姜濤@Mirror,其第5首單曲《孤獨病》於今日正式派台。今次姜濤首度擔任導演,親自執導MV,並挑戰高難度一鏡過拍攝,目的只為姜糖帶來驚喜。


《孤獨病》由林奕匡作曲、陳詠謙填詞,內容講述一個人孤苦無依靠的內心世界。歌曲以孤獨為主題,而姜濤過去在腦海裡一直都有個畫面跟歌曲的主題很匹配,他說:「好耐以前就有一個spotlight打落嚟,得我一個嘅畫面喺腦海裡,但從來都冇合適嘅歌曲可以呈現出嚟,今次遇上《孤獨病》,係一個好好嘅機會去用呢個idea,所以我就同花姐講,可唔可以俾我參與拍攝MV嘅過程。」姜濤因此順利成章成為〈孤獨病〉MV的導演。

其實早在拍攝《蒙著嘴說愛你》MV時,當時的導演袁劍偉已想以一鏡過拍攝姜濤的MV,但最後因為種種原因改以其他方法拍攝;今次《孤獨病》終以一鏡過拍攝,姜濤說可算是還了一個心願。今次首度擔任導演,被問到最好玩的地方是甚麼,姜濤笑言:「最好玩係可以坐喺導演位掌控成個MV,呈現喺你心目中嗰個樣,可能開頭唔似你想要嘅嘢,但係慢慢就成形,呢個係最過癮嘅地方。」說到最難忘的事情,姜濤則表示是與工作人員之間的溝通,他說:「好多嘢唔符合你嘅畫面,你要慢慢同大家溝通,先可以做到你心目中想要嘅畫面,呢樣嘢睇落去好似好容易,但其實任何一支MV或隻影片,你哋睇到1秒嘅shot,都要好多工作人員配合先可以完成,加上今次係1 shot過,更加需要大家配合,所以都NG咗好多次。」

對於自己首次執導,姜濤坦言未做到最好,他說:「我已經盡咗力,拍咗我心目中想要嘅嘢,當然理想同現實有一定嘅差距,但我已經好滿意,覺得可以拎出嚟同大家見面。因為要見得人,係要過一個好高嘅關卡,所以過到自己,即使成品未係100分,都希望大家睇到都會有『wow!』嘅感覺。」姜濤更說,如果再有機會,下次或者會再執導演筒,拍一支跳唱MV。

姜濤第五首單曲《孤獨病》MV將在明晚2/9 晚上八點在Mirror YouTube channel 首播


 [新歌推介] 姜濤親自執導《孤獨病》MV 挑戰高難度一鏡過拍攝

 https://www.facebook.com/starshk