無論係學啲咩, 我地都想知道當中技巧竅門, 好讓自己能於最短時間內取得最大成就。詠春本身極具科學性及邏輯性, 好多時候我都需要細心分析, 拆解及整合, 才能更了解其系統。學習詠春以來, 我認為, 多學習、多練習、多試驗、多思想、多分享, 這五個元素最能夠令我極速成長。

 

多學習, 這不止於向師父學習, 還可以向其他師兄弟學習。學習時, 應細心觀察及分析, 例如每次師父打套路嘅時候, 我都會百分之二百集中精神, 細心觀察師父嘅每個動作並盡量模仿, 因為每學一樣新事物, 均始於模仿, 如果連表面動作也模仿不了, 更莫說要學當中的底蘊。另外每位師兄弟嘅風格及喜好都不一, 多細心觀察, 便能睇到各師兄弟直得學習嘅地方。還記得有位師兄嘅拍手中掌, 做得非常漂亮並且效果顯著,睇到我金精火眼, 其後經分析及拆解, 我也學會了。

 

多練習, 還記得初初學習詠春個陣, 好多時候都係最早到嘅一個, 亦都係最遲走嘅一個。當早到個陣, 我就獨個兒練習套路, 當師父注意到嘅時候, 便會糾正我動作, 之後我也用心記住, 力求每次練習都能做到要求。另外, 於課堂上, 我不會浪費每一分每一秒。不是與師兄弟黐手, 便是在練習套路, 每當黐手到累時, 我就會練習套路用作回氣。另外我還會於練習套路其間, 四圍觀察其他師兄弟黐手時嘅技擊技巧, 總之一句講哂「唔好比時間自己停下來」。正因為沒有一刻停下來, 所以我嘅進步也快過其他人。

 

多試驗, 每樣新招式或技巧, 都需要千錘百煉才能練成, 不要妄想能於短時間內速成。每當我學習新招式時, 我都會以一招為限, 若果練多過一招, 集中力便會被分散, 成效不止減半, 最終咩都練唔到。所以一定要集中火力只練習一招, 當對每位師兄弟均能使出那一招嘅時候, 才叫做練成, 當練成屬於自己嘅招式後, 就會有跳躍式嘅進步, 因為你已經領會到當中嘅竅門。我師父經常說「不要去揀對手, 無論對方強還是弱, 都要多試」, 因為到實戰時,對手不容我地選擇, 正因為不同嘅對手所給予嘅反應都不一, 這有助提高對不同類型嘅對手嘅適應性。

 

多思想, 不要只為練習而練習, 還要去分析、理解及整合自己所學。例如, 小念頭套路中嘅「攤、膀、伏」有何標準? 如何運用? 三種手形之間的關係及其局限性。另外小念頭一共有三節、尋橋有兩節、標指有五節, 每一節嘅主題是什麼?每項套路嘅核心思想又是什麼?當你愈清楚, 你練習嘅成效才會更顯著。

 

多分享, 不但有助詠春的傳承, 還能增進同門感情, 每當我的解釋能讓師弟門, 更明白手法的運用及原理, 那種成就感更是難以筆墨所言喻。另外教人嘅時候, 往往會不經意間想通了之前, 連自己都唔明白嘅地方。若果自己沒有能力解釋比對方明白, 就證明自己只是一知半解, 有時候什至對方的問題也是自己沒有想過, 畢竟每個人遇到的問題都不同, 但每個問題均能刺激我再去深入思考, 讓我於詠春路上走得更遠, 正所謂「教學相長」。

 



 https://www.facebook.com/wingchuncc