投資的圖片搜尋結果

(網上圖片)

2018年2月頭,生活,本來係無咩問題嘅,只不過係月頭HSI跌左4000點果個禮拜,戶口少左成個零頭有多,心情忐忑,但係,無計,鬼叫你做錯野咩,早賣左隻HSI put,又有隻700遠期價外call,仲有隻傻蛇1337,睇錯pick錯做錯落錯買錯賣錯,所以,後果要自己食。好彩,之後個倉重新執過,國泰君安利豐聯想莎莎,叫做追返吓些少幫補吓咁啦。後來有朋友話,股票風險高,可以買一隻基金對沖風險,入場費10萬hkd起,年息8定9%我唔記得嘞,息就可以每個月派,不過如果想攞返本金,要第6年先可以攞返晒唔駛罰,如果第1年內贖回要收本金嘅6%做penalty,第2年5% penalty……第5年2% penalty。我話個plan睇落唔夠flexible呀lockup period又長,佢話你咁叻你自己操盤做囉,我話係呀咪做緊囉;咁你performance點呀,我話上年一隻碧桂園救全家,今年好好直到2月頭就唔多好啦;咁咪係囉,你估你係基金經理咩?妖,用自己錢操作,同fundman用opm操盤係唔同technique同心理嘅,宜家起碼得定唔得,我自己負責吖,仲可以real time知,唔駛等季結年結吖!大佬呀,唔好覺得所有人都需要買你嘅基金產品先得嘅,我自己走去買華夏隻3188仲開心,好似全世界得你一隻野係堅其他都係垃圾咁。心諗,「呢啲野,我唔想做。」

有朋友公司被投資者睇中左,先比生意後想注資,入埋股做個平起平坐嘅大股東。好嘞,但係,你知道啦,投資者關係,IR呀,係件好難處理嘅事,就好似女人比男人入左個心、老婆被老公入左個家一樣,之後會變左高度依賴呀,紛爭又多!最慘係投資者成deal之前,一直都有比些少生意朋友間公司做,不過,當然係有受氣嘅,大老闆,係難湊啲嘅。喂,UAT過左後想改野,你話收唔收錢做?檢驗完貨後出街之後先發現出事,係監工、production、供貨定係個客本身嘅問題呢?直到有一日,你心諗,妖,夠嘞,我又唔係等你開飯,等你比錢我做隻殼,況且,無你我生活照樣過,有左你生活仲難過左,所以,你決定,同投資者留低五隻字,you really piss me off。「呢啲野,我唔想做。」

成日有人話,你選擇我唔係因為我嘅好,而係你知道我嘅唔好,而仍然可以愛我。對唔住,sorry呀,係totally bullshit,呢份「愛」,肯定係有conditional嘅啦,因為,佢心知,因唔「愛」你嘅「失去」比「愛」你嘅「得到」為少,計唔掂條數,搵鬼愛你呀。如果apple出件新產品,同你講,話件野肯定係有deficit,仲要premium價賣比你,咁你會唔會買吖?如果有條友去你公司interview,同你講,話你一定要請我,因為你肯請我係源於我嘅唔好,你要好好包容,而唔係因為我嘅好,聽完之後,你肯定會大叫OMG,妖到個HR上天花板。大佬呀,人地肯接受你,係因為你嘅pros大過cons,你帶嚟嘅價值好大機會大過潛在disadvantages,係經過理性思考嘅膽博膽行為。市場上,話可以投資大概每RMB14,800一單位嘅product,年回報率大概6至7%當中包括guarantee同non-guarantee部份,總共派兩年之後可贖回;仲有一啲話月息3%,一年36%,兩年72%,要提前半年講贖回,可無限期坐貨,too good to be true,好唔真實,所以,一定要拒絕,多謝人地比你呢個機會,「呢啲野,我真係唔想做。」

每日都有人叫你做唔同野、買唔同產品、去唔同活動、搞唔同生意、聽唔同故事、參加唔同課程、去唔同約會、睇唔同野……由你朝早起身去刷牙但你兄弟不停拍門話趕時間叫你快啲你話等多陣先啦果刻開始,你一日之中,可以/會拒絕多少人呢?入去地鐵車廂,比人叫行入啲啦喂,你借唔借?你老死話佢銀行戶口被freeze左,問你借幾萬蚊嚟頂頂先,你借唔借吖?入到間餐廳明明大把位你走去個卡位坐但個waiter衝出嚟同你講呢邊未開唔坐得叫你坐張窄到無輪嘅圓桌,你話仲食唔食吖?隔離team阿頭David話呢排好忙,做trade fair唔夠人,問你呢個operation大佬借阿Tim、Jonathan同最鍾意嘅Peggy一個星期救駕,你話借唔借吖?投資者話比director's loan你、中小企貸款部話比個loan你、而你果個做廠嘅舅父又話想打本比你、市場出面啲團隊話借幾千萬比你激活你個account之後搞上市……你又會拒絕嘛?你個做基金嘅老死話有隻野升硬不過公司要申報成個月所以好難自己買到,問你借個戶口做幾個trade,咁你又借唔借吖?

有能力嘅,係可以唔帶任何條件下、好決斷咁拒絕你。只需用一種態度、一個行為,就可以睇到你到底夠唔夠底氣。所以,唔缺錢、唔缺人、唔缺能力,唔缺實力,根本係唔駛比面你。「呢啲事,我唔想做。」嘅背後意思係,「我大把野揀,你比呢啲野(選擇/服務/產品/人/事)我,你究竟係咪傻架?」你估你真係咁大影響力咩,對方無左你會好大獲?定係你無左對方就會自我滅亡?會好唔掂呢?

做人最放開就係唔怕失去,所以可以夠絕。佢唔介意無左你呢個朋友,因為佢知道,你存唔存在,佢都會過得好好。對方係唔駛假裝鍾意你、唔駛比面你、唔駛同你妥協、唔駛話你聽發生咩事,佢可以隨時隨地、拒絕完你然後輕鬆走人。可能,你會覺得佢好衰、好怪、好無情無義、好無人性……不過,最後你都係無可耐何,因為,佢係上把而你係下把,就好似做兵咁,只可say yes不能say no,因為只要你一say no,你夢想中嘅果個世界就玩完。


 「呢啲野,我唔想做。」