講起喺外地居住或工作,相信好多人第一時間都會諗起英美兩國,但其實自從舊年發生咗英國脫歐以及美國總統特朗普上台之後,大家對呢兩個國家嘅睇法都開始產生變化,認為佢哋無論喺政治同經濟上都不復以前嘅穩定。

由InterNations每年所作嘅統計,根據13000位旅外人士嘅投票,喺65個國家當中選出10大最愛及最討厭居住嘅國家。

最高排名嘅係位於中東嘅巴林,原因係投票者認為當地非常歡迎外國人去工作、生活,甚至係定落嚟開枝散葉。但同樣位於波斯灣地區嘅沙地阿拉伯、科威特以及卡達,就位列最尾10名。

而香港人非常嚮往到訪、擁有愛琴海絕美景色嘅希臘則因為國家嚴竣嘅經濟問題而排包尾。

令人驚訝嘅係,其中一個旅外人士最喜歡工作嘅地點竟然係中國大陸,當中有3份之2嘅受訪者都表示喺當地有好好嘅發展。但其喜愛居住國家嘅排行就只得第55位,原因係生活質素偏低,包括嚴重嘅空氣污染,以及昂貴嘅醫療同教育開支。

至於亞洲嘅其他國家,台灣就由去年嘅第1名跌至第4,而香港嘅勁敵新加坡就排名第9,而香港則只排第39位。

從數據睇嚟,香港同鄰近發達國家地區相比,生活質素真係差一大截呢……

(圖片來源:tumblr)