designer的圖片搜尋結果

(網上圖片)

有agency的設計同copywriting,比個corporate客改左廿九幾萬次,由executive、senior executive、assistant manager、manager、director,一路改到去老闆到,次次改、層層改,無限輪迴地獄又折返人間,春天改到秋天會習慣,designer個心改到淡,早已分不清,自己究竟是AI操作員定designer,兩者其實有咩分別?

如果老闆唔比一個實在的指令下屬,下屬可以點做?自己試?問秘書?煩老闆?如果客戶唔比一個確切的方向vendor,vendor可以點做?自己估?問行家?煩客戶?

那下屬和vendor,當然會運用他們所掌握的知識、判斷、能力水平,來開始工作,總不會一直等等等到deadline才做。可是,若你遇到一位yes man/yes woman/yes human,那就大件事啦。

有啲人,成日同你講「無問題、你搞啦、你安排、我放心」,其實,他們一啲都唔放心,亦都不把你的問題上心,經常都事事問長問短,你講完佢又問過,解釋完又係唔知,成日自己自說自話,最終,都係用返佢個套來做,說穿了,只是一個「口講放心實質是個不折不扣的control freak」罷了。

點解唔可以一開始清清楚楚講出你的要求?點解唔可以坦白?無budget咪無budget囉,你講清楚我可以選擇唔接這單job呀!你有概念咪有概念囉,可以只叫我去執行咪得,點解又要問人有咩可行方案,到人地開始計劃執行果時又要ban人橋、kill人idea,然後再用返最開初的方法?

點解要口是心非?因為,一個人自己最欠缺的東西,往往自己愈會強調。做生意與人爭執得最多的人,愈會同你講和諧。一個最度數的老闆,愈會向你講「你睇我對你幾好」。一個最獨裁(又無能)的人,愈會同你講「你睇我平時幾尊重你的諗法呀」。

點解要口是心非?因為,其實,可能,往往,大部分時間,自己都唔知自己想點。因為,他們唔認識世界、唔認識工作的本義、唔認識自己。

好多人話,工作上的爭議,當中唔少,可能是出自於表達方式或理解問題。坊間有很多「口才訓練課程」專家或「資深人力資源顧問」,常常同大家分享不同議題,例如甚麼「職場上常犯錯10句說話」、「拆解之術」、「NLP洞察人心」之類。可是,最最最核心的方向——關於態度與個人認知,都較少提及。如果你察覺到你的合作方是這個樣子,請記得,盡快離開。