買Audi「王者之車」唔容易　全球限量1部要抽籤

唔少電影嘅靚車只為套戲專屬炮製，好少喺現實上市發售，不過間中都有例外。2月嗰陣Aston Martin就曾經將007電影《鬼影帝國》(Spectre)中，James Bond揸嗰部Aston Martin DB10拎出嚟慈善拍賣。

嚟緊都有部被喻為「王者之車」嘅特別版跑車發售，講緊係《太空戰士XV：王者之劍》(Kingsglaive: Final Fantasy XV)入面，Lucis王國部專用公務車Audi R8 Star of Lucis。

呢部車內外充滿Lucis王國華麗風，車軨有如盛放中嘅花卉，同車內蔓藤花紋圖案互相呼應，配搭白色真皮跑車座椅、橙色縫線等，潮得嚟又夠豪。

雖然佢個性能同量產版無異，用610PS 5.2L V10引擎，但全世界只此一架夠罕有，所以身價自然高，開價5,000萬円(未連稅)，折合大約HK$378萬，已經貴過香港現時賣緊嗰兩個型號。

如果你都想成為「王者」，可於11月21日上官網登記，到時會以抽籤方式確定買家。