科學館新開專題展覽「古怪動物園」,我跟SY說:「星期六我哋一早就去玩」SY回答:「好古怪架? 得唔得人驚架?」未曾參觀的我, 估計科學館的展覽也不會「恐怖」吧!

SY很大反應說:「呢!!幾年前呢! 嗰啲恐龍嚇死我」(咁今次唔係走真實風格, 卡通路線...都唔會驚啦) 16組互動區,絶對無有怕之餘,小朋友個個玩到We嘩大叫。

 

必玩第一區:「氣味記憶」 

4個平平無奇的噴氣管,大家伸手入內擠壓,便可以聞得到不同動物的氣味,味道可能用來「霸地盤」,可能「求偶」或「自衛」,又可能「識別同類」...…

懷著滿心歡喜的SY, 一放鼻到噴管...即時彈開並大叫:「好臭呀!」,阿太猶豫又試:「有幾臭呀?動物「求偶」應該香呀?」...…結果…...

作嘔大叫的阿太:「臭到冤.…..原來係啲狐狸霸地盤, 唔怪之得...真係好臭, 爸爸你都聞下啦, 淨係影...(我:咪攪)」

 

必玩第二區:「糞球大賽車」

從未想過世界上真的有以動物的糞便為糧食,又喜歡將糞便滾成波波的動物...…這位小昆蟲叫「糞金龜」。

我將「糞金龜」的故事告訴SY,他一邊玩推糞便遊戲,一邊冷淡回應:「乜真係有啲咁嘅動物咩? (我:你個GAME咪推緊屎囉), 點會..…係朱古力波嚟呀!點解係屎?」

 

必玩第三區:「盲頭烏蠅」

巨型大烏蠅,介紹出烏蠅的生存方式,原來牠們是用腳來試食的...…不過,我第一眼見到超巨大烏蠅,我第一時間想到蟻俠喎。

(你好驚呀? 我見你嚇咗一嚇) SY:「佢講嘢好大聲, 我頭先無諗到啫...…不過,爸爸!如果佢頭頂個烏蠅拍可以拍落嚟就好,衰烏蠅好污糟食嘢前又要嘔一輪...…好核突」

(潔癖基因開始成功遺傳!!)

 

必玩第四區:「血液大兜亂」

原來血液唔單只有紅色,蟹、草蜢、螳螂、龍蝦...…原來不同動物的血液有不同顏色, 這個遊戲要4位參賽者比賽,估中便會得分。

我問SY:「你點知蝦、蟹嘅血係藍色呢?」,好開心的SY答:「我唔知架...…估之麻,我再玩多次就會啱晒,爸爸,我要玩多次。」

(小朋友...…題目唔會次次一樣啦)

 

必玩第五區:「牛牛進食記」

大肥牛被解剖了給大家看看,四個胃的牠展示如何進行反芻消化食物. 我:「好殘忍, 劏開咗隻牛」。

SY:「假嘅!公仔嚟之麻, 有咩殘忍。」我:「隻牛都無眼睇...草又唔食」, SY:「佢Enjoy緊呀! 爸爸你睇...佢個肚會發光添呀, 幾得意!」

 

必玩第六區:「便便大檢閱」

從動物的糞便認識牠們的進食習慣...…有四個潛望鏡,只要對準目標,便可以即時測出便便的主人是誰。

SY:「最大嗰果好啲...…」我:「最大嗰舊屎唔駛講一定係大笨象啦!!仲駛講咩!唔通係你嘅咩?」

SY:「爸爸!你唔好成日講啲核突嘢啦!」

最後臨離開前,有一個「海底奇遇記」,一隻大大潛水艇旁邊有一條瀡滑梯...…我問SY:「潛水艇可以探索奇趣深海生物?」

SY:「咩索? 係條滑梯短咗啲,不過質地好滑,好刺激!」(我知道,如果唔係你點會瀡完又瀡啊!)

古怪動物園
日期: 即日至11月2日
地點: 九龍尖沙咀東部科學館道2號
時間:平日上午10時至晚上7時
        周末及公眾假期上午10時至晚上9時
        星期四休館 

門票:標準票30元 | 團體票21元 | 優惠票15元
星期三標準票10元 | 團體票7元 | 優惠票5元

博物館通行證持有人免費入場

電話:2732 3232
網址:http://hk.science.museum/ms/ag2016/index.html

大仁生活


 【臭得有道理】 6大必玩最古怪遊戲 @ 古怪動物園

 https://www.facebook.com/hayakutang