有好多人對周浩鼎係面書出圖,高調反對同性婚姻,有很大反應。佢地既反對意見,大抵係講周氏提出的,都是歪理,最保守的歪理。如同性婚姻會破壞一夫一妻制度,會影響下一代福祉,會衝擊固有家庭價值。

而同啲撐同志權益既朋友,都有轉發周浩鼎個圖,話「咁九月投票你識投啦?」Sorry,我真係唔識。民建聯對同志唔友善,呢個唔係第一日新鮮事。情況就好似你屋企有一個唔接受你係同性戀者既老豆老母,佢地會去排成本五蚊一隻既粽,佢地都好想有人,可以鬧佢地啲仔女,果啲同性戀,死基佬死基婆既仔女,可以幫佢地出一口烏氣。

對建制派,本來都冇咩期望。畢竟一男一女婚姻既喜悅,我唔會明白。周浩鼎律師寫呢三點,真係好有份量。如果佢入左局既話,我希望佢可以更用力咁既維繫異性戀婚姻既純潔同傳統,廢除離婚制度,再禁止婚內避孕,如男女雙方是旦一方拒絕發生性行為,都不得離婚。咁先至係真係會維繫到一夫一妻制,同埋保守固有家庭價值。

周律師講呢啲,我梗係明佢想點。但係,我對果啲同志團體,網路上既同志漫畫專頁,話「九月識投票啦」,就唔係抱咁大信心。真心講,民建聯講得出呢句,好明顯就係分工。周浩鼎搞同志,葛佩帆搞公務員票。大家黨內有晒分工。泛民呢?有邊個敢出黎講,佢立場同周浩鼎一樣,反同志婚姻?又有邊個好似梁天琦咁,夠膽出黎講,佢義無反顧撐同志婚姻?周律師識玩既地方係,佢啲票好鐵,一扔呢個議題出黎,就只會令左右唔係人既泛民亂上加亂。而且,投票並唔只會係因為佢對同志婚姻既立場係點咁簡單。簡單講句,如果我係年輕同志,社民連話支持同志婚姻,但係又支持全民退休要收佢2.5%強積金,你估佢會唔會撐社民連?有啲議題,唔係想像中咁簡單,但講得撇脫,建制派絕對會做。

泛民又可以點應對呢?



 https://www.facebook.com/kengopage