拍硬檔，你要撐起英格蘭隊，哈利簡尼，你唔係一個人在戰鬥！（曉高臣）

經歷過無數英倫前鋒早熟早殘既例子，作為一個十年英超既見證人，我已經唔多敢再對英倫前鋒有過份既期盼。

幾驚哈利簡尼唔係俾人鏟斷對腳，就係俾英超後衛睇通睇透佢既路數。為咗睇佢，我挨夜走去睇U23歐洲國家杯，睇足三場英格蘭既賽事，最後英格蘭隊都係小組出局，而且無緣出年既奧運足球賽，哈利簡尼冇所斬獲，表現只能講係中規中矩。

年輕人，真係要好好把握好每一次大賽經驗。喺有限既青春當中極可能去綻放自己既光芒，哈利簡尼舊年都仲係一個冇人識既小夥子，家陣變成係冇人唔識既超新星。

後生如艾殊頓、戴倫賓特、安祖莊臣、安祖卡路爾等人，年長如格蘭賀特、列基林拔、森莫拉、高治等人，邊個未試過一季/半季爆紅？但最後能夠keep住勢頭既冇幾多個，係呀，仲有好多半紅不黑既例子，艾殊利楊格、艾朗連儂、艾邦拉荷……有排數，好命既可以好似祖高爾咁，球會同國家隊都撈得掂，可惜敵不過傷患又係好快淡出，英格蘭咁多黎唯一一個奇跡應該就係朗尼，然而穩如泰山既正選位置，朗尼卻冇喺國家隊交出太多代表作，唔通英格蘭整定係冇運？

哈利簡尼，簡直就好似係治療系既前鋒，治療系既文章可以治療人既心靈，治療系既前鋒一樣可以治療球迷既心靈。

如果單純話佢走位靚，射術好，咁通街都係啦。哈利簡尼最大特點係無球跑動特別多，而且喺前面可以hold住個波，盤扭同過人都得，哈利簡尼二傳掂，分波俾邊路亦掂，等隊友更好地同佢配合，全能前鋒既典範在於，佢仲可以交出防守數據例如攔截同搶波，你話啦，呢d咁勤力又有料既前鋒，買少見少啦。

以前d英格蘭球隊最鐘意用442陣式，總之是鳩但擺兩個前鋒喺最前，一高一矮，一個頂得一個跑得就ok，宜家英格蘭球隊開始沉迷4231陣式，對前鋒既要求更高，梗係一個前鋒做曬幾個前鋒可以做到既野，咁前鋒後面就可以擺多d創造性球員去支援前鋒，而哈利簡尼自然成為英格蘭球隊最寵愛既一種前鋒類別。  

Pick up到如此良機，哈利簡尼邊有得唔大紅大紫？加上佢又靚仔，靚仔得黎唔囂個下先叫得人喜愛。如此出色既前鋒，大家應該好好珍惜佢，我真心想佢成功，完成連尼加、舒利亞、奧運等超級射手都未能完成既創舉：幫英格蘭拎返個大賽冠軍。  忽然又醒起王晶點評劉德華既句子，佢話劉德華呢份人精益求精，每日就算進步1%，佢都會努力。從哈利簡尼身上我就見到呢種特質，好勤力好勤力，你話啦，點可能唔撐呢d咁有hear既後生仔？

比起李斯特城既華迪，我更加想熱刺既哈利簡尼撐起英格蘭隊，因為青春，無論幾時都係球員最大既本錢。 趁住每晚仲有少少時間，趁住每晚距離第二朝早都仲有好長時間，一定J爆哈利簡尼，識J一定J哈利簡尼。佢唔係一個人，佢肩負起好多代人既期望咖！

哈利簡尼上季精華片段：

作者：曉高臣（本文章由聚言時報授權提供）