對的人,對的時間,卻不一定有天長地久。以艾拿戴斯同莫耶斯既執教能力,教富貴黨或者超級強隊未必掂,但教中型班真係fit曬,如果佢地當初唔係離開保頓/愛華頓,我認為佢地可以教到退休都得。

費sir,曼聯傳奇教練;雲加,阿仙奴傳奇教練,佢地既共同點都係將原本聯賽成績一般既球隊帶上冠軍寶座,執教時間長達二十年或以上。

艾拿戴斯有機會成為保頓既傳奇教練,佢將一支英冠球隊帶到上英超,憑佢交際廣闊,手腕甚好,不斷遊說其他名牌球隊既球員加盟保頓,將呢隊波變成實而不華既英超長青樹,唔但止站穩腳步,仲要殺入埋歐洲賽事,保頓呢隊波有好強既特色,就係爛打,以弱勝強既例子甚多;莫耶斯有機會成為愛華頓既傳奇教練,佢當年黎 到愛華頓只係一名救火教練,最後協助愛華頓護級成功,憑佢獨特眼光,不斷買入平靚正既球員,既保證了聯賽成績,仲幫愛華頓賺唔少錢,愛華頓曾經喺04-05賽季榮登聯賽殿軍奪得歐聯席位,自此愛華頓都成為英超既著名中上游球隊,穩穩陣陣,發展方向好好。

艾拿戴斯當初離開保頓,因為佢想執教大球會從而更加有機會奪得冠軍殊榮,可惜佢既離開並不成功,執教紐卡素一個賽季已經俾人結果,之後輾轉於布力般流浪同韋斯咸兩件球會落腳,始終都執教唔長時間已經俾人解僱,而冇咗艾拿戴斯既保頓似乎搵唔返以前個套老人院方針,漸漸都喺英超挨唔住降咗落去英冠,而今個賽季暫時喺英冠聯賽墊底,情況令人擔憂,艾拿戴斯都唔好過,走馬上任成為新特蘭教練,能否帶領新特蘭護級呢,仍好似一場賭博咁,大同細冇人會知。

莫耶斯當初受曼聯邀約而離開愛華頓,我認為係佢人生最大污點,莫耶斯話曬都拎過英超全季最佳教練獎,仲要拎過兩次添,去到曼聯卻搞唔掂朗尼等大帝,人都管唔掂,戰術調配更顯得騰雞,有時候佢既調配真係幾無厘頭,例如用個後衛換落一個中場,之後又用中場換落一個後衛。莫耶斯執教曼聯35場英超賽事,已經俾人解僱,唔好做第二個費sir,連返愛華頓都冇可能,因為愛華頓已經物色到另外一個好教練馬天尼斯,帶領愛華頓繼續舒舒服服佔領中游位置。而莫耶斯執教皇家蘇斯達,成績不過不失,領隊個帥位並不穩陣。

能夠執教一支球隊超過八年時間或者以上,證明球會係絕對信賴該名教練,呢樣野喺英超並不常見,英超老細最鐘意炒人魷魚呢樣特性舉世聞名,莫耶斯執教愛華頓超過十一年,真係難能可貴,艾拿戴斯都執教保頓八年,單單喺英超就帶領保頓順利過渡六個賽季。

係天意弄人,定人情世故理應如此,我自然唔識分,喺我心目中,艾拿戴斯既保頓,莫耶斯既愛華頓,真係兩支非常好既球隊,而能夠用蔗渣既價錢炮製出燒鵝既滋味,正正係艾拿戴斯同莫耶斯既功力深厚既體現,奈何,人總係離開咗熟悉既地方,就搵唔返熟悉既歡樂聲和讚賞聲。

 

作者:曉高臣(本文章由聚言時報授權提供)


 限米煮限飯既高手:艾拿戴斯@保頓/莫耶斯@愛華頓(曉高臣)

 https://www.facebook.com/GaldenPolymer/timeline