工作，經驗就是一切

「工作」

好多年輕人都會問我佢哋下一步應該點。所以想分享自己嘅睇法。首先讀書唔係為成績，因為現今嘅老闆係睇你做嘢嘅能力多過學業嘅成績。因為大家知道學歷唔代表工作能力。所以我好多時會同啲學生講，出去做多啲嘢，攞多啲經驗。去體驗下出面嘅世界，乜嘢大細嘅公司都去做下睇下。學習唔同嘅文化！唔好浪費時間，同時要做唔同嘅工作，體驗唔同行業嘅運作。

「經驗」

我一般會用五年作一個單位。二十至二十五大家仲可以用學歷去搵工，但係二十五至三十就睇能力。所以要係頭幾年學越多嘢越好，唔好太在乎錢。因為錢之後可以搵返！二十五之後要更加努力，爭取管理經驗，因為年紀係你嘅資產！到三十之後管理先至帶俾你回報。所以用頭十年攞最多嘅工作經驗！而金錢其實係次要！

「回報」

到人生中年經驗勝過一切，無人再睇你嘅學歷，而年紀再唔係你嘅資產。所以如果你可以三十歲左右上到管理層，你就有優勢！三十至三十五要爭取機會管理業務，最好同金錢有關。因為三十五之後公司係睇你有乜嘢貢獻，所以之前嘅經驗會幫到你！而四十之後就全睇經驗。而金錢回報就係四十之後先會出現。所以經驗係一切！