相關圖片

(網上圖片)

黑仔同老婆講,話打完波會同波友食飯,老婆已出permit,所以,偷左一啲時間,見吓翠兒。佢知道,做人,商業上、感情上,做個有骨氣嘅人,都係無用嘅。

你睇吓,快速測試、抗病針、大數據、人同人之間嘅關係、火車站入面啲鐵柱,全部都可以係假、造假、虛假。你今朝打開新聞台,見到日本仔有三間車廠,炭排放數據造假,全部車都要全球回收。你又見到果個美國twitter總統,日日叫個檢察官唔好調查果單通俄案、同大陸係好好朋友、沙特阿拉伯無派特務去殺人,你諗諗吓,其實幾年前有位dream bear都只係寫左一封信比CY之嘛,相比之下,佢都唔算好無禮貌、失禮、無logic吖,哈哈。你離開淋浴間,出到嚟,坐係sofa,翠兒已經整好午餐比你食嘞。

「你隻腳點呀?」

「妖,頭先比人整親隻腳,落場唔夠一分鐘就收左皮,真係……」

「咁點呀,有無用冰止痛呀?」翠兒伸出左隻手,摸住個傷口位,打圈按摩,好舒服呀;就好似有大戶,無啦啦伸隻手出嚟,幫你手接曬啲蟹貨咁,令你好鬼感動。

 

「有呀,入左醫療室呀,仲見到劉sir呢,佢宜家光左頭,成個呀叔咁款呀……」

「咁呀……Derek呢,佢仲係咁呀?」翠兒追問。

「有咩野吖,佢咪同以前一樣囉!妖,今次又輸比佢地,個心頂住頂住,佢老味吖……」其實,真果句,你都唔知幾想變做hulk打獲佢啦……

 

你知道,工廠有員工跳樓,所以公司之後會用多左機械手臂做機器,就好似Tesla咁。你知道,屋企個老婆麻麻煩煩,所以個老公會用多左社交App搵人性交。你知道,公司個上司騙人騙得愈多愈成功,騙員工又騙股東,所以其他員工頂唔順走晒而上司變埋做總裁,企業管治都係唔會變好嘅。問題嘅出現,係永遠唔會帶來一個你希望見到嘅正面解決方案嘅。往往,事與願違。只會,愈來愈差呢。

 

「唔緊要,下次打過囉!有輸有贏嘛!」翠兒安慰你。

「邊度跌低,邊度企起!不過,老嘞,隻腳唔聽話吖…」你親吻左翠兒塊臉一下。

「……我雙腳,邊似你咁聽話呀?」

你雖然把口取笑緊佢,不過,你好肯定知,你對佢嘅,呢份係愛;你對你老婆嘅,係責任。而759阿信屋老闆對住759嘅果份簡直係無盡嘅愛同責任。而Tesla老闆對住果啲沽空佢公司股票嘅人肯肯定係恨。

 

「…你呀!快啲食野啦,啲野凍晒啦!」翠兒伸脷,畀左個傻笑樣我。嘩,好難想像,一個就嚟四張野嘅女人,撒起嬌上嚟果陣,都可以咁可愛,令你想起prime時期嘅宣萱同李若彤 。就好似恆生銀行,呢啲上左市成四十幾年嘅公司,都仲可以咁堅,管理層唔會無啦啦失聯,業績唔會無啦啦突然走樣,有息派,唔會停牌,呢種公司絕無僅有,遇到一定要好好珍惜呀。

 

「下個月中,我好得閒呀,一齊去歐洲行吓囉?」

「唔得呀,公司好忙,有幾單deal睇緊呀,做埋先行得開呀……年底啦,OK?」

「你公司又買野呀?都唔知你其實係做auditor吖,定係做buyer呀?哈哈。」

「你唔知咩,宜家連big4都四週圍買野入股呀,做到成個VC咁款呀!」

「咁又係……」

「之前,大陸啲P2P平台爆爆地,又有啲疑似scam嘅case,果啲ICO又流流地咁呀,我認識知道幾個上海嘅fund都投錯了,所以,老闆話要小心啲呀……」翠兒好無奈咁解釋,「所以,不如,今年年底啦!我地去巴黎囉!」佢講果陣時,你感覺到她臉上的快慰。

 

你隨手,用筷子夾起左放係盤上面果條「爆爆地嘅米粉絲」,又望住放係果柜上面個部差緊電嘅小米Note2,心諗,唔知佢地幾時爆呢?同時爆定分開爆呢?尿袋先爆定1810先爆呢?唔通英利同及時雨係同一個集團、發達財務同將軍財務係同一個老闆、領達係中資背景、安信係東亞支持,你又會關心想知咩?新鴻基公司擁有UA、新鴻基證劵變左光大新鴻基、新鴻基就起樓,你又會、又想分得清清楚楚咩?你只會想知道,大細息點分、提早還錢罰幾多、轉plan點做,其他野,你係唔多想知嘅。又例如,支付寶同渣打合作,通過運用區塊鏈技術,匯款果時嘅匯款人同收款人,都可以清楚追蹤到資金狀況,所有匯款訊息都會加密處理,而菲律賓環球電信所擁有嘅支付公司,將會通過支付寶,向香港18萬個菲律賓傭工,提供新嘅國際匯款選擇;而呢次,好可能係首個使用區塊鏈技術做匯款嘅業務,一來降低成本,二來提高效率。但係,個問題係,你識鬼咩叫區塊鏈咩,你所認識最長最賺錢嘅鏈,係香港馬會果條3串7或者4串6或者5串15,最有效率果條鏈叫做3T,你中左呢條鏈之後,嘩,成千上萬倍呀大佬,起碼有兩三年唔駛做呀。又或者,買區塊鏈集團啲股票,搭下順風車啦。

 

「無問題,就今年年底啦!我地去巴黎,順便落去瑞士同埋意大利啦!」回一回神,你對住翠兒,微笑左一下。

「咁好嘞,應承左我啦你!」

「係啦係啦,放心啦你!」

「要差唔多走啦我,再text啦!記得同我鎖門同洗碗呀!仲有呀,你呀,記得睇醫生呀,比賽完左,就唔駛再做PT啦,有時間就休息多啲啦!你估你仲後生咩?」

「知啦知啦,拜拜!」你從後抱住翠兒,輕輕親吻左佢耳背。

「拜啦,黑仔!」佢對住你笑左一下,就轉身推門走左嘞。

你幾年前重遇翠兒。

 

你結左婚,佢離左婚。尖沙咀,sheraton,宴會廳,一個百無聊賴嘅networking活動,你忽然間見到一個貌似佢嘅人,坐在不遠處。兩個選擇,視而不見,或者,走過去望望。就係呢份好奇心,讓你嘅人生大大改變左。原來,對住果份那些年嘅感情,直到宜家,都仲係咁實實在在嘅。就好似宜家,匯豐,日日52週低,你有兩個選擇,視而不見,定走過去望望玩番兩野。年青時,翠兒之後,你有好多。之後,你老婆佢同你已經成十一年,共過幻難,歷盡辛酸。你搞startup,欠錢,佢借。你要擔保人,佢做。你要空間做生意,佢比。你話要賣盤,佢支持。最後,佢變成你屋企人,最親密嘅人,但係,唔係戀人feel。代表啲咩呀?充滿責任但係無愛呀,充滿感恩但係無激情呀。

 

你幾年前也重遇了果個充滿激情、愛恨分明嘅黑仔。


 道理。世界