日本無論城市定村落,都遍佈大大小小嘅神社,我哋作為遊客去打卡就打得多,但除咗要遵守神社禮儀之外,你又知唔知求緊嘅係咩神,仲有個神到底係男定係女呢?(小編:乜原來有分男女㗎?)

日本TBS電視台嘅節目《林先生が驚く初耳学!》就講解呢個話題,連唔少日本人都表示大開眼界!其實要分辨神社所供奉嘅神祇嘅性別一啲都唔難,學識咗1秒就分到!

其實關鍵就喺神社屋頂上突出嘅位置—「千木」。千木嘅尾端有兩種削法,分別係垂直向住地面,同埋與地面平行兩種。兩種削法分別係代表住男神同女神。

除此之外,日本嘅斜路原來都有分男女,分別名叫「男坂」同「女坂」!咁到底又係點樣命名嘅呢?

原來坡道嘅性別同神社都有好大關係,以前修行嘅人要行上神社,就要選擇比較斜同難行嘅「男坂」。

而一般參拜者就只係需要行無咁斜同易行嘅「女坂」慢慢上山。

但時至今日,你係咩身份都唔緊要喇,想挑戰自己嘅話,無分身份、男女,你都可以選擇行男坂㗎!

(圖片來源:japan-chiba-guide、TBSテレビ截圖)