呢個星期,有好多人去書展,去買某一個寫書好多逗號既作家兼區議員既書。有好多人都笑佢,話佢文氣不通,語焉不詳,又話書展品味淪喪云云。 

喂?哈囉?你而家同我講,香港書市既品味?幾時我地開始追求品味架?由o靚模去書展,到明星去書展,到人地港姐阿媽到個女廿幾歲仲寫書講自己個女有幾叻,香港人既閱讀市場,幾時有追求過品味呢? 

而當你發現,香港既書店,都係某個國家既壟斷,出版社、發行商、書店一條龍,佢地就有權決定,邊個可以寫書,邊個可以出書。而出既書,書店唔入貨,就可能只會係書展既時候,賣到一次。你可以發現,大部份暢銷既書呢,都需要書店支持,先可以擺係書店一段長時間。 

為左配合香港既書店既品味,書封面,封底設計,都有一定既要求:書封底最好有幾多個推薦序,睇幾句就最好講晒本書講咩,封面最好有作家的樣子。原因係咩呢?有書店店長就同我講:「入黎買書既人呢,好忙既,冇咩時間。你要用最短既時間,話畀佢地知,佢手上面本書係咩:邊個寫既,有幾好睇,有幾有用。總之,三秒,佢見到你本書,你個書名,封面,封底,之後拎去收銀機度,你先會成功。仲花時間打書釘,睇下本書頭幾版先買?傻啦,邊有時間,邊有位?書店咁細,睇幾版書先買,又迫又花時間,邊個會做?」 

結果,書展而家就變成左係啅頭遊戲,最核突,最癲既野,就會係書展同面書度出現。呢幾日,洗版既係咩呢?一個步入中年既前男歌手,扮小學生出寫真。一個已入中年既女性政客,用盡PS修圖之能事去出一本跟自己樣貌完全不一樣既寫真。 

呢D,叫書展。而家,你同我講書展品味淪喪?問心,你上次買過,睇完既書,係咩書?係邊本?



 https://www.facebook.com/kengopage