飯枱係屋企重要嘅家具之一,亦係同屋企人進食嘅地方,但唔講唔知,如果飯枱擺放位置有問題,隨時影響住屋企人嘅感情、健康、財運等問題,原來一張飯枱影響住咁多問題,以下裝修佬同大家分享飯枱嘅擺放風水。

(文: 巨龍)

飯枱上不宜用燭型吊燈 

蠟燭型吊燈雖然設計新穎,頗有觀賞價值,但因為白蠟燭係喪失嘅象徵,將佢掛係一家大細進食之處,並非吉兆,建議換其他造型吊燈或其他顏色嘅燈便可解決。飯枱上應盡量避免掛燈飾,因為當有人坐係度嘅時候,就自然形成燈壓頭,影響思維活躍性,不利於事業嘅開拓發展。 

 

飯枱不宜過大 

大型飯枱豪華氣派係無可厚非,但必須注意飯枱同飯廳嘅大細比例,如果飯廳面積細,但擺大飯枱,形成廳細枱大,出入不便之餘仲會阻礙飯廳嘅風水。 

 

飯枱切忌被廁所門直沖 

廁所係風水上被視為污穢不潔之處,故越隱蔽越好,如對正飯枱,往往導致家人健康問題。如果因位置問題無法移開,可以係飯枱正中擺放一個細水盆盤用水浸養鐵梳頭或開運竹方法化解便可。 

 

飯枱忌有尖角 

尖角角度愈細就越尖銳,三角形飯枱會導致家口不和,令健康受損,棱形飯枱會導致錢財外泄,波浪形水狀的飯枱,雖同傳統不符,但因並無尖角,尚可勉強選用。 

 

不宜擺放橫樑下 

橫樑壓頂係風水大忌,屋內無論邊個地方有橫樑壓頂都唔吉利,壓係睡床、沙發、飯枱及爐灶嘅禍害最大,應該儘量設法避免。而飯枱上面有橫樑壓頂,可用天花掩蓋,但最好方法係飯枱移去其他位置。 

 

飯枱同大門成一條直線 

門外可以看到一家大細食飯,並非好事,而且飯枱正對大門容易漏財,住宅風水講究「喜迴旋忌直沖」,如有犯沖就會導致屋內人元氣易泄,風水因而大受影響,最好將飯枱移開,如果實在唔得,可以放置屏風遮擋。 

 

飯桌不宜正對神台 

神台係供奉佛像及祖宗牌位嘅位置,嚴格來講,不宜同凡人進食地方太接近,倘若供奉嘅係觀音、佛祖諸神,由於佢地係戒殺生茹素食齋,而隔離食飯卻大魚大肉,正面相對就會格格不入。將飯枱儘量同神台保持一段距離,最重要係將飯枱移開,務求唔會一條直線。 

 

飯枱不宜被門路直沖 

食飯時候必須寧靜安穩,先可以閒適咁享用一日三餐,如有門路直沖,唔單止有損風水,仲會食不滋味,如果飯廳多通道,猶如置身漩渦中,周身唔聚財,可以用屏風或將客飯廳分開。 

 

飯枱顏色   

飯枱顏色宜選較為中性,以天然木色、咖啡色等穩重顏色為佳,可以促進食欲,儘量避免過於鮮豔、刺激嘅顏色,純黑或純白嘅飯枱亦唔適宜。

 

(以上圖片均來自網路,如有任何版權問題,請與本站聯絡)


 【裝修風水學】你知道嗎?飯枱擺放有禁忌!

 https://www.facebook.com/hkdecoman