一向喜歡地道食品嘅我,有一日係西灣河四圍閒逛時就見到有間兜踎茶檔,就坐低叫咗碗平常不過的餐蛋麵。老闆係一名大隻仔,望落有幾分似宇宙最強丹爺!等咗一陣,阿言(大隻仔)就拎咗碗麵出嚟,一望已經暗叫:OK喎!塊餐肉都有煎過架,再夾起塊餐肉睇吓,簡直滾動到喊,因為兩面都有煎過架,而且唔係求其煎兩下咁!平日去開D茶餐廳,塊餐肉唔係凍嘅已經好好,煎一面已經皇恩浩蕩,阿言竟然咁好心機!?夾埋D麵食,真係正到無朋友,比起果D乜乜園,XX冰室同上市茶仔,阿言嘅麵真係好味百倍。因為麵入味得嚟,唔會太淋,而且個麵唔係散開哂,又夠熱,絕對唔係果D求其烚下放入碗,再落粉同水嘅茶仔可以相比。

今個星期特登帶埋朋友去試下個宇宙最強餐蛋麵,點知阿言話要試下佢個蛋包飯同撈麵,心諗:乜料呀?就咁煎蛋包住D飯都無咩特別,唔係好想試喎!阿言見我猶疑,立即話佢D蛋包飯係放好飯係碟,再放蛋跟住用刀切開有蛋汁流出嚟個種,同係Facebook流傳果個一樣。好!既然佢咁有信心,就一個蛋包飯一個撈麵喇!

 

個蛋包飯上枱時已經切開左,上面D蛋汁已經包住個飯,上面再淋上阿言特制日式咖哩汁,真係好好味呀!阿言控制個火候剛剛好,睇相都見到仲有D蛋汁係到流出嚟。日式咖哩汁係阿言特別調制,同出面唔同,而且更好味!個飯原來唔係一般白飯,係有雞肉同調咗味嘅飯。嘴刁嘅朋友一試就講,個飯有D似糯米,好食。一問之下先知原來阿言托朋友買入嘅米係超一級靚米,比一般餐廳用嘅米貴2倍,加上阿言用特別方法炮製先會有少少黏既口感。

 

到個撈面上枱,原來係豬腩肉撈麵。豬腩肉煎香,配上洋蔥汁一D都唔覺得肥膩,聞已經好香,加埋個麵好正!唔講齋睇個賣相仲以為係炒丁麵,因為細心嘅阿言係撈好個麵先上碟,一D都唔似係撈麵!

不過先旨聲明,各位有興趣去試嘅朋友一定要有等嘅準備,因為每樣出品都係阿言親自即場煮,唔等得的朋友,千祈唔好去,例如我今次,食完個蛋包飯,個麵先上枱,等左足足20-30分鐘!仲有要去就要早少少,好多時到下午1點左右已經無哂午餐肉!大家亦唔好諗住外賣,因為外賣就唔好食,一定要即場食先好味。

阿言茶檔:

地址:西灣河太富街華記士多

營業時間:7:30 - 14:30 (大約)